Kumar Ashirwad : सोलापूरशी नाते कायम राहील; नागरिकांच्या प्रेमाचे ऋण कधीही विसरणार नाही : कुमार आशीर्वाद

सोलापूर : नागपूर येथे बदली झाली असली तरी सोलापूरशी निर्माण झालेले भावनिक नाते आयुष्यभर कायम राहील. जिल्ह्यातील नागरिकांनी दिलेले प्रेम, लोकप्रतिनिधींचे सहकार्य आणि अधिकारी-कर्मचाऱ्यांच्या पाठबळामुळे अनेक महत्त्वाकांक्षी विकासकामांना गती देता आली, अशी भावना सोलापूरचे माजी जिल्हाधिकारी कुमार आशीर्वाद यांनी व्यक्त केली.

जिल्हा प्रशासनाच्या वतीने नियोजन भवन येथे आयोजित निरोप समारंभात ते बोलत होते. यावेळी जिल्हाधिकारी एस. कार्तिकेयन, जिल्हा परिषदेचे मुख्य कार्यकारी अधिकारी कुशल जैन, अप्पर जिल्हाधिकारी गणेश निऱ्हाळी यांच्यासह विविध विभागांचे वरिष्ठ अधिकारी उपस्थित होते.

कुमार आशीर्वाद म्हणाले, जिल्हाधिकारी म्हणून काम करताना प्रशासनातील प्रत्येक अधिकारी आणि कर्मचारी हा यशाचा भागीदार असतो. प्रशासनात शिस्त, पारदर्शकता आणि वेळेवर निर्णय घेण्याची भूमिका महत्त्वाची असते. याच तत्त्वांमुळे अनेक लोकाभिमुख उपक्रम यशस्वीपणे राबविता आले.

त्यांनी आपल्या कार्यकाळातील पंढरपूर कॉरिडॉर प्रकल्प, सोलापूर विमानसेवा, आषाढी वारीचे नियोजन, पूरपरिस्थितीतील प्रभावी व्यवस्थापन तसेच जनता दरबाराच्या माध्यमातून नागरिकांच्या तक्रारींचे निवारण या उपक्रमांचा विशेष उल्लेख केला. सामान्य नागरिकांच्या समस्या सोडवण्यासाठी काम करता आले, हेच आपल्या कारकीर्दीतील सर्वात मोठे समाधान असल्याचे त्यांनी सांगितले.

यावेळी जिल्हाधिकारी एस. कार्तिकेयन यांनी कुमार आशीर्वाद यांनी निर्माण केलेली प्रशासनातील कार्यक्षमता आणि लोकाभिमुख कामकाजाची परंपरा पुढेही कायम ठेवण्याचा विश्वास व्यक्त केला. मुख्य कार्यकारी अधिकारी कुशल जैन यांनी त्यांच्या नेतृत्वशैलीचे आणि विकासाभिमुख दृष्टिकोनाचे कौतुक केले.

कार्यकाळातील ठळक उपक्रम

• पंढरपूर कॉरिडॉर प्रकल्पाला गती
• सोलापूर विमानसेवा सुरू करण्यासाठी पाठपुरावा
• आषाढी वारीचे यशस्वी नियोजन
• पूरपरिस्थितीत प्रभावी प्रशासन
• सोमवार आणि शुक्रवारी जनता दरबारातून तक्रारींचे निवारण

"माझी बदली झाली असली तरी सोलापूर माझ्या मनात कायम राहील. सोलापूरकरांनी दिलेले प्रेम आणि विश्वास आयुष्यभर विसरणार नाही. जिल्ह्याच्या विकासासाठी भविष्यातही माझे सहकार्य कायम राहील."
— कुमार आशीर्वाद, माजी जिल्हाधिकारी