आसाममध्ये भारतीय वायू दलाच्या AN-32 विमानाला अपघात; जोरहाट एअरबेसवर लँडिंगदरम्यान आग

आसाममधील जोरहाट एअरबेस येथे भारतीय वायू दलाच्या AN-32 मालवाहू विमानाला शनिवारी सकाळी अपघात झाला. प्राथमिक माहितीनुसार, विमान लँडिंग करत असताना त्याला अचानक आग लागल्याने एअरबेसवर एकच खळबळ उडाली.

विमानाला आग लागल्याची माहिती मिळताच एअरबेसवरील अग्निशमन दल, आपत्कालीन बचाव पथके आणि सुरक्षा यंत्रणा तातडीने घटनास्थळी दाखल झाली. आग आटोक्यात आणण्यासाठी युद्धपातळीवर प्रयत्न करण्यात आले.

संरक्षण विभागाच्या सूत्रांनी दिलेल्या माहितीनुसार, दुर्घटनाग्रस्त विमान हे भारतीय वायू दलाचे AN-32 मालवाहू विमान होते. मात्र, अपघाताचे नेमके कारण अद्याप स्पष्ट झालेले नाही.

या दुर्घटनेत कोणतीही जीवितहानी झाली आहे का, विमानात किती कर्मचारी किंवा जवान होते, तसेच नुकसान किती झाले याबाबत अधिकृत माहिती अद्याप जाहीर करण्यात आलेली नाही.

दरम्यान, भारतीय वायू दल आणि संबंधित तपास यंत्रणांनी अपघाताच्या कारणांचा शोध घेण्यासाठी चौकशी सुरू केली आहे. तांत्रिक बिघाड, लँडिंगदरम्यानची अडचण किंवा इतर कोणत्या कारणामुळे विमानाला आग लागली, याचा तपास केला जात आहे.

घटनेनंतर एअरबेस परिसरात सुरक्षा व्यवस्था वाढविण्यात आली असून अधिकृत अहवालाची प्रतीक्षा आहे.