लहान मुलांना झिका व्हायरसचा धोका आहे का?

पुणे : शहरातील झिकाच्या रुग्णांची संख्या सातत्याने वाढत असून ती आता 16 वर गेली आहे. कोरोनाचा पहिला रुग्ण पुण्यात आढळला होता आणि झिकाचा पहिला रुग्णदेखील पुण्यात आढळला आहे. त्यामुळे पुणं हे साथीच्या रोगांचं हॉटस्फॉट बनत आहे का? हॉटस्फॉट बनत असेल तर त्याची कारणं काय आहेत? लहान मुलांना झिकाचा धोका आहे का? असे प्रश्न समोर येत आहेत. #लक्ष्यवेध 

पुण्यात झिकाचा रोज एक रुग्ण वाढत आहे. हे एकाच परिसरातील रुग्ण नसून विविध परिसरातील रुग्ण आहेत. आतापर्यंत 8 गरोदर महिलांना झिका ची लागण झाली आहे. त्यांना निरीक्षणाखाली ठेवलं आहे. खासगी रुग्णालयास संपर्क साधून त्यांच्यासोबत महापालिकेच्या डॉक्टरांनी बैठक घेतली आणि त्या रुग्णालयातील गरोदर महिलांची माहिती मागवली आहे. त्या रुग्णालयांना देखील झिका संदर्भात सतर्क करण्यात आलं आहे. 

झिका हा संसर्गजन्य आजार नाही

पुण्यातील वस्ती असलेल्या परिसरात आणि सोसायट्या असलेल्या परिसरात देखील रुग्ण आढळले आहे. झिकाचे चे डास हे थोड्याशा साठलेल्या पाण्यातच तयार होतात. त्यामुळे घरात जर पाण्याची साठवणूक करत असाल तर एक दिवस ड्राय डे पाळणं गरजेचं आहे. 

झिका डासांचे अंडी आढळणाऱ्या सोसायट्यांना दंड करण्यात येतोय. मात्र दंड न करता जनजागृती करणं हा या मागचा हेतू आहे. लहान मुलांना झिका चा धोका नाही. मात्र त्यांच्या आहाराकडे योग्य लक्ष ठेवणे, व्हायरल इन्फेक्शन होणार नाही याची काळजी घेणं गरजेचं आहे. झिका हा डेंग्यू आणि चिकुनगुनिया सारखा एडिस डासांमुळे पसरणारा विषाणूजन्य आजार आहे. हा आजार विशेष घातक नसला तरी झिका प्रभावित गर्भवती महिलांमध्ये जन्मलेल्या बाळांच्या मायक्रोसेफली (मेंदूचा आकार लहान असणे) या स्थितीशी संबंधित आहे. भारतात 2016 मध्ये गुजरात राज्यात प्रथम झिका विषाणूच्या संसर्गाची नोंद झाली होती.