सांगोला हादरले! पेपर चोरी करणारा अल्पवयीन पोलिसांच्या जाळ्यात

सांगोला (प्रतिनिधी): सांगोला शहरातील शैक्षणिक क्षेत्राला हादरवून सोडणाऱ्या १० वी बोर्डाच्या प्रश्नपत्रिका चोरी प्रकरणाचा अखेर उलगडा झाला असून, या गंभीर गुन्ह्यातील आरोपी म्हणून एका अल्पवयीन मुलाला सांगोला पोलिसांनी ताब्यात घेतले आहे. या कारवाईमुळे परीक्षेच्या पारदर्शकतेवर प्रश्नचिन्ह निर्माण करणाऱ्या या घटनेचा छडा लावण्यात पोलिसांना यश आले आहे.

मिळालेल्या माहितीनुसार, १७ मार्च रोजी सांगोला विद्यामंदिर प्रशालेतील कस्टडी रूममधून अज्ञात व्यक्तीने १० वी बोर्डाच्या प्रश्नपत्रिका चोरी करून नेल्या होत्या. ही घटना उघडकीस येताच संपूर्ण तालुक्यात खळबळ उडाली होती. विद्यार्थ्यांमध्ये तसेच पालकांमध्ये भीतीचे आणि संभ्रमाचे वातावरण निर्माण झाले होते. परीक्षेची गोपनीयता धोक्यात आल्याने शिक्षण विभागही सतर्क झाला होता.

या प्रकरणी सांगोला पोलीस ठाण्यात भारतीय न्याय संहिता २०२३ तसेच महाराष्ट्र विद्यापीठाच्या गैरप्रकार प्रतिबंधक अधिनियमान्वये गुन्हा दाखल करण्यात आला होता. घटनेचे गांभीर्य ओळखून सांगोला पोलीस आणि सोलापूर ग्रामीण स्थानिक गुन्हे शाखेच्या (LCB) विशेष पथकाने तातडीने तपास सुरू केला.

तपासादरम्यान पोलिसांनी विविध तांत्रिक पुरावे, सीसीटीव्ही फुटेज तसेच स्थानिक माहितीच्या आधारे संशयितांचा शोध घेण्यास सुरुवात केली. गोपनीय माहितीच्या आधारे एका अल्पवयीन मुलावर संशय केंद्रित झाला. त्यानंतर पोलिसांनी संबंधित मुलाला ताब्यात घेतले आणि पालकांच्या उपस्थितीत सखोल चौकशी केली असता त्याने हा गुन्हा केल्याची कबुली दिली.

चौकशीदरम्यान आरोपीकडून चोरीला गेलेल्या १० वी बोर्डाच्या प्रश्नपत्रिका, तीन कोऱ्या उत्तरपत्रिका, कस्टडी रूमचे कुलूप तोडण्यासाठी वापरलेले इलेक्ट्रिक कटर तसेच गुन्ह्यात वापरलेली इलेक्ट्रिक दुचाकी असा मुद्देमाल जप्त करण्यात आला आहे. या जप्तीमुळे गुन्ह्याचे स्वरूप अधिक स्पष्ट झाले असून, आरोपीने एकट्याने हा प्रकार केला की त्यामागे आणखी कोणी आहे का, याचा तपास सुरू आहे.

या संपूर्ण कारवाईत वरिष्ठ अधिकाऱ्यांचे मार्गदर्शन महत्त्वाचे ठरले. विशेष पोलीस महानिरीक्षक सुनील फुलारी, पोलीस अधीक्षक अतुल कुलकर्णी, अपर पोलीस अधीक्षक प्रितम यावलकर तसेच उपविभागीय पोलीस अधिकारी डॉ. बसवराज शिवपुजे यांच्या मार्गदर्शनाखाली ही कारवाई पार पडली.

कारवाईत सांगोला पोलीस ठाण्याचे पोलीस निरीक्षक विनोद घुगे, स्थानिक गुन्हे शाखेचे अधिकारी संजय जगताप, सपोनि वाघे, सपोनि मोरे आणि इतर पोलीस कर्मचाऱ्यांनी महत्त्वाची भूमिका बजावली. या गुन्ह्याचा पुढील तपास सपोनि मोरे करत असून, या प्रकरणाशी संबंधित आणखी धागेदोरे उलगडण्याची शक्यता वर्तवली जात आहे.

दरम्यान, या घटनेमुळे परीक्षा व्यवस्थेच्या सुरक्षिततेबाबत प्रश्न उपस्थित झाले असून, भविष्यात अशा प्रकारांना आळा घालण्यासाठी अधिक कडक सुरक्षा उपाययोजना राबवण्याची गरज व्यक्त केली जात आहे.